سين وجيم .. عن ما يحدث في مصر وموقفك من جريمة اغتصاب وطنك

 

صورة لبلطجية يوم الاربع بيطحنوا الصحفيين والمتظاهرين

حاسس بالعار والأسف الإحباط الرهيب من الناس اللي بتلوم المتظاهرين عشان إصرارهم على رحيل حسني مبارك ونظامه فوريا وبيلوموا المشاركين في الاعتصام وبيقولوا البلد فيها فتنة

عارفين الموقف ده عامل زي ايه؟ زي واحد بلطجي بيغتصب واحدة واحنا شايفين وسامعين ومع ذلك بنقول “هي بتصرخ ليه؟”، هي بتستنجد ليه؟، هو مش خلاص قال انه هيمشي، احنا اصلنا أعصابنا ضعيفة ومش مستحملة وبعدين احنا ورانا مصالح وأشغال عاوزين ننزلها وعاوزين نجيب عيش وننزل الشوارع تاني.

صدقوني لو فكرتم بعقلكم للحظة هتلاقوا ان ده اصدق مثل على اللي بيحصل، طب ممكن أسألكم سؤال؟ مين المسئول عن الإهمال والفساد اللي في بلد؟ مين زور انتخابات مجلس الشعب ؟ مين طلق بلطجية الأمن على مصر من تلات اربع ايام بس وخلانا كلنا مرعوبين؟ وفي ثانية اختفت الشرطة كلها وفي ثانية برضو ضغط على زرار رجع الشرطة تاني؟ ومين بضغطة زر برضو قفل عنكم كل وسايل الاتصال محمول وانترنت ووقف حركة القطارات ورجعكم للعصر الحجري؟ مين ليلة امبارح فتح النار على المصريين العزل في الميدان زي أي كلب صهيوني بيموت الفلسطينيين؟ مين مسيطر على إعلام الدولة اللي هو ملككم كلكم ومجنده لحسابه؟ مين اللي مستخبي زي الكلب وكل يومين يعمل خطاب منعرفش بيقوله منين؟ وسايب الشرفا بيموتوا في الشوارع

برضو هتلوموا المتظاهرين اللي بيدافعوا عن مصر ضد الظلم والديكتاتورية؟ الناس اللي معرضة نفسها للخطر عشانكم واستشهدت وبتناضل عشانكم؟ الناس دي على فكرة لا تنتمي لحزب ولا لجماعة ولا لأي حاجة يعني مش طمعانين في مكاسب

 

ماجد محمود أحد ضحايا المظاهرات اللي اتعرض لإيذاء وحشي من جانب الأمن

وبعدين هل دي فتنة؟

الفتنة دي تبقى بين طرفين وعنصرين في الأمة مفيش فرق بينهم او جماعتين متساويين، انما ازاي تبقى فتنة وفريق جايب بلطجية مسلحين بحصنة وجمال ورشاشات ومسدسات وسيوف خرجوا من تحت الأرض وفريق بيناضل بقاله اسبوع وبيهتف ويقول “سلمية سلمية وارحل ارحل”.. ايه الفتنة في كده ؟ .. قدامك بلطجي حقير مغتصب للوطن وقدامك ضحية لا ذنب لها، هنرجع نلوم عليها لأنها بتصرخ بصوت عالي؟، لأنها بتقاوم؟ لأنها بتقول لأ؟ للدرجة دي بقينا خنازير؟ .. محدش قالك انزل واتظاهر ولا دافع ولا هاجم بس قول كلمة طيبة .. ادعي لهم متدعيش عليهم .. اسعف مصاب ابعت رسالة لكل اللي تعرفهم خليك إيجابي .. التغيير ده عشانك مش عشان حد تاني.

طب سؤال هو مش مبارك قال هيمشي الناس زعلانة ليه؟

اقولك يا سيدي المشكلة مش في مبارك.. المشكلة في النظام

يعني ايه نظام؟

نظام يعني مبارك مكنش بيحكم البلد لوحده، مبارك رئيس حزب الحزب ده مكون من مئات المنتفعين والأثرياء والفاسدين في كل حتة وفي اقلية قليلة دخلته من باب انه الفرصة الوحيدة للدخول في السلطة، كل الانتهازيين في مصر في الحزب ده، عاوز تعرف انتهازيين منين؟ جرب كده إسأل أي واحد فيهم ايه أفكار الحزب أو خطته أو هدفه هيقولك معرفش هو اسمه الوطني الديمقراطي الحزب الرئيس والولاء واللقمة الحلوة اللي بناكلها من وراه وهتلاقيه معين قرايبه في الحكومة او واخد ارض مخالفة او عامل عملة موالس فيها مع الحكومة

الحزب ده ليه مش اقل من 450 عضو في البرلمان دفعوا دم قلبهم وجابوا بلطجية وزوروا عشان ياخدوا عضوية المجلس زي ما شفنا من شهرين ومعاهم  وزراء في الحكومة الجديدة وبتوع مجلس الشورى وبتوع المجالس المحلية، وقيادات كتيرة في الشرطة مش أغلبية باختصار كده أي قواد عندك في المنطقة بيجري اول واحد يعلق يافطة نبايع ونؤيد الرئيس وابنه، ومع دول عدد من رجال الأعمال المستفيدين من الفساد بشكل أو بآخر سواء باحتكار او فساد او رشاوي، امبراطوريات كاملة قايمة على ان البلد فاسدة والفساد بيأكلهم ويغذيهم، ده غير قيادات الإعلام الحكومي اللي هم اعضاء في الحزب الوطني في نفس الوقت، اللي بياكلوا من ورا النظام بجرايدهم وتلفزيوناتهم وهم عارفين كويس قوي انهم منافقين وان الشعب مش هيرحمهم ومع كل دول شوية ناس ربنا كرمها في الفلوس بتاعتها فخايفة أي حاجة تبوظ لها شغلها وخلاص يعني هي مش متواطئة انما بتقول البلد حولة واحنا مبسوطين، مبارك لو سافر اهو هيمشي انما دول بيقولوا دلوقتي يا روح ما بعدك روح ومستعدين يمنعوا التغيير بأي طريقة خلال الـ7 شهور الجاية.

 

طب ودول ممكن يعملوا ايه؟

لأ بقى دول يعملوا كتير لما تبقى انت راجل أعمال دافعلك خمسة ستة مليون عشان تنجح في المجلس وتبقى حزب وطني ولا لما تبقى رجل أعمال غير شريف النظام بيحمي فسادك او لما تبقى ظابط شرطة فاسد ودول مش أغلبية الشرطة على فكرة ومستفيد من سيطرتك على المجتمع اللي حواليك هتعمل كل ما في وسعك عشان تنقذ امبراطوريتك انها متتهدش ومحدش يحاسبك .. وبعدين ايه السر ان البلطجة في مصر مرتبطة يا اما بالانتخابات يا بالمظاهرات اي حد يهدد الحزب الوطني يطلع له بلطجية؟ مش غريبة شوية؟

بس خلاص مبارك قال انه ماشي؟

بأمارة ايه يا حبيبي؟ ايه الضمان؟ كل ده عشان الخطاب؟ انتم ناسيين ان عبد الناصر اتنحى ورجع في قراره بجحة الجماهير، شوف انت بقى لما يبقى واحد ماسك الجيش والشرطة والحكومة والإعلام والبلطجية وقاعد في البلد لسه كمان سبع شهور صعب عليه يعمل مظاهرات تأييد ومبايعة ويجيب ناس تتوسل إليه انه يواصل الحكم، بلاااااااااش اهو هيمشي تضمن منين ان الحزب الوطني ميطلعش منه حد تاني ويستولى على الحكم بنفس أساليب تزوير الانتخابات ما هم بيزوروا والشرطة بتحميهم يا جدعان، هم في ايديهم كل حاجة واحنا الشعب على رقبته السيف والمسدس، ومبارك بيعين رؤساء المحاكم والقضاء ورئيس مجلس حقوق الانسان وكل حاجة في ايده.

بس ده اتكسر قدام العالم؟

نفسي اعرف إزاي عاوزين تدوه الأمان بعد كدبه وألاعيبه.. مش هو ده اللي قال “خليهم يتسلوا” على البرلمان بتاع المعارضة ، رجع ليه دلوقتي يقول احترام احكام القضاء راح فين سيد قراره يا بيه؟ بيقولك مش طمعان في سلطة طب قاعد فيها ليه من 30 سنة؟ وبعدين انت مش قلت انا معكم طالما في الصدر قلب ينبض ولا دلوقتي مبينبضش يا كذاب، وبعدين دلوقتي غيرت الحكومة؟ اشمعنى دلوقتي كنت فين لما الكهربا والمية اتقطعوا وأزمة الأنابيب الغاز وأزمة العيش وغرق العبارة وتعذيب خالد سعيد؟ كنت فين وكلابك بتنهش لحمنا ولا انت مبتجيش غير بالجزمة؟ ….هل ده انسان تديه الأمان لمدة سبع شهور؟ .. كنت فين وسليم العوا وبيشوي بيهاجموا بعض لحد ما الفتنة الطائفية كانت هتدمر البلد.. عارفين كان فين كان بيقابل طلعت زكريا ولا فارقه معاه .. اه والله مش نكتة ده حصل .. ولا همه أي حاجة غير بعد تفجير الكنيسة اللي هزنا كلنا مسيحيين ومسلمين

 

ضحايا العبارة اللي مبارك كان بيتريق عليهم من كام شهر

بس في كلام ان اسرائيل وامريكا ورا المظاهرات ودربوا الناس؟

ده بقى تخريف وكلام مضحك عارفين ليه؟ مبارك يا جماعة كان أكبر حليف لأمريكا في المنطقة ليه لأنه بيعمل 3 حاجات : 1 بيضمن استمرار حالة السلام بين مصر واسرائيل ده غير تصدير الغاز طبعا 2 بيساعد أمريكا في الحرب على الإرهاب وتبادل المعلومات المخابراتية وأمريكا من خمس سنين كانت بتبعت لمصر ناس تستجوبهم وتعذبهم عشان ده ممنوع في امريكا 3 مبارك بيكره إيران عدو أمريكا وإسرائيل وبيساهم في مواجهة النفوذ الإيراني في دول الخليج اللي هي مصدر بترول أمريكا

انا شخصيا بدرس في أمريكا دلوقتي بقالي تسع شهور وراجع مصر تاني كل ما اقابل حد يهودي أو امريكاني متعاطف مع اسرائيل يسألني بخوف تفتكر الاخوان هيمسكوا الحكم في مصر؟ تفتكر مين ممكن ييجي بعد مبارك؟ عارفين هم مرعوبين ليه؟ عشان عارفين ان قرار السلام معاهم مش شعبي ده جاي من فوق من عند الرئيس عشان كده الامريكان والاسرائيليين بيحبوه ويهمهم يفضل في السلطة اطول وقت وكان حلمهم جمال مبارك يمسك بعديه عشان يفضل مأمن لهم الجبهة المصرية .. طب إزاي بقى دول ولا دول هيتأمروا ضد مبارك؟ اللي مش مصدقني يقرا وثائق الويكليكس المسربة عشان يعرف حب الأمريكان لمبارك ونظامه ويتابع تصريحات بايدن نائب أوباما وتصريحات هيلاري كلينتون الحريصة انها متخسرش مبارك وتصريحات نتنياهو نفسه أو يدخل على مواقع الجرايد الإسرائيلية بالإنجليزي وهو يشوف رعب الإسرائيليين من المجهول القادم في مصر، هم صحيح بينتقدوه من وقت للتاني لكن ده شغل ماكياج قدام شعوبهم مش اكتر انما المصلحة معاه معاه.

معنى كده اننا هنحارب إسرائيل او ما يمشي؟

لأ طبعا ما هو كمان احنا مش اغبيا عشان نخوض حرب محناش ضامنين نكسبها لكن أقل حاجة هتحصل ان منصدرش ليهم غاز ونعمل لنفسنا معاهم شوية كرامة يعني نربط علاقتنا الدبلوماسية معاهم بمدى حرصهم على السلام مع الفلسطينيين واستعدادهم لتقسيم القدس مع العرب مش نبقى عاملين لهم خدنا مداس، نعمل على الأقل زي تركيا اللي واخدة منهم موقف دبلوماسي رغم حالة السلام بينا وبينهم، نعمل بس أي حاجة تحسسنا اننا كشعب في قيادة بتسمع لينا وحريصة على إرضاءنا

يعني الاخوان جايين بعد مبارك؟

الاخوان أصلا منظموش حاجة .. والتلفزيون المصري والنظام المصري بقاله خمس سنين كل مصيبة في البلد ينسبها للاخوان عارفين ليه؟ عشان الغرب ممثل في امريكا وأوروبا وإسرائيل طبعا بيخاف مووت من أي حكومة إسلامية لتعمل زي إيران عشان كده مبارك خلال السنين اللي فاتت في كل مناسبة بيرسل إشارات لأمريكا والغرب بيقول لهم “يا إما أنا يا إما الاخوان” .. الظريف واللذيذ ان الاخوان مكنش لهم في المظاهرات دي اصلا ونزلوا بعد خمس ايام بعد ما كانت الدنيا ولعت لما حسوا ان لازم يبقى ليهم دور عشان يقسموا المكاسب بعد كده وربنا أعلم بنيتهم انا مش هحكم عليهم .. انا مش بحب الاخوان لأني ضد مزج الدين بالسياسة انما للأمانة كمان الاخوان اكتر ناس النظام اعتقلها وحاربها وتحفظ على فلوسها فالاخوان مش بعبع.. ثم ان احنا حاسين انهم كتير بينما هم اقلية وده عشان الشعب المصري كله مش بيشارك في الانتخابات فهم لما بيلموا الكام ألف بتوعهم في كل دايرة بنحس انهم أغلبية لكن احنا كلنا أصلا كشعب مقاطعين الانتخابات من زماااااان .. احنا الأغلبية الصامتة المتعلمين اللي بيجروا ورا أكل عيشهم.

بس المصيبة يا عم ان احنا مش عارفين مين يصلح ييجي بعد مبارك؟

يا جماعة احنا مش هدفنا نمشي مبارك ونجيب ديكتاتور جديد احنا هدفنا ان أي حد تاني ييجي بشرط ان يبقى في نظام انتخابي حر وشفاف وعليه اشراف قضائي ومنظم ومتأمن ا نشا الله الانتخابات تتعمل على مدى شهر مش يوم واحد زي ما ولاد النصابة بيعملوها في كل محافظة ولا يبقى فضيحة وبلطجة ورشاوي بحيث نضمن اننا ننتخب اللي بيمثلنا واللي يهمل فينا يفقد مكانه بالانتخابات برضو زي انتخابات الأندية والنقابات، صوتنا للي بيخدمنا، لكن لا يفرق معانا البرادعي ولا ايمن نور ولا الاخوان، المهم اننا نقدر كل اربع سنين نغيرهم، وعشان كده مهم ان اللي يمسك بعديه يكون مدني مش عسكري، الجيش فوق الراس وليه كل السلطات لكن الجيش المفروض يكون مستقل ويحمي البلد انما السياسة دي تبقى لينا احنا نختار اللي احنا عاوزينه والجيش حقوقه محفوظة ومتصانة بما فيها ميزانيته المالية محدش يقرب لها.

 

فوضى ايه أكتر من قتل خالد

بس مش ده هيأثر علينا ويعمل فوضى؟

مش هيحصل، كل بلاد أوروبا الشرقية وبلاد أوروبا وآسيا مرت بالمرحلة دي وبقت دلوقتي اقوى من الأول ثم ان بقاء الوضع على ما هو عليه كان واخدنا من أسوأ لأسوا .. لا تعليم ولا فرص عمل ولا صحة ولا شرطة تحميني ووسايط ومفيش أي احترام للقانون والأسعار كل يوم فوق فوق والحوادث مبتنتهيش إهمال وفساد ومواطنين بلا كرامة .. وناس بتموت نفسها عشان تهاجر عاوزين ايه تاااااااني فوضى اكتر من كده ايه؟

بس الناس الغلابة اللي المظاهرات وقفت حالها دي ذنبها ايه؟ والناس اللي بتحرس المباني ليل نهار ذنبها ايه؟

ارجع واقول نلوم المغتصب ولا نلوم الضحية؟ مين عمل فينا كلنا كده؟ مش هو؟ ونظامه وكلابه؟ ممكن حد يقول لي فين حبيب العادلي دلوقتي؟ وارجع واقول وجع ساعة ولا كل ساعة ما كل الغلابة والفقرا هو سببهم، بلااااااش! الـ2 مليون عسكري أمن مركزي المعدمين دول المجندين بالغصب والقوة ما هو سبب جهلهم وأميتهم؟ وعدم وصول التنمية ليهم بيتاخدوا من الدار للنار لا هم فاهمين ولا عارفين بيضربوا مين؟ مش هو اللي عامل قانون طواريء من 30 سنة؟ مش هو؟

بس قناة الجزيرة كدابة ومشعللة الموضوع؟

انا بتفق معاكم ان الجزيرة مبتحبش مصر لكن ارجع واقول هي الصور اللي بيجيبوها مش حقيقة ؟ إزاي نغمي عنينيا عن الحقيقة الواضحة قدام عنينا؟ الضرب والقتل والقوة؟ وبعدين بلاش جزيرة ممكن حد فيكم يفتح تلفزيون الدولة أو يقرا الجرايد القومية أهرام وأخبار وجمهورية وما خلافه .. وسائل الإعلام دي ملك الدولة يعني ملك الشعب مش ملك رؤساءها واللي ماسكينها.. مين يقول انهم من اول يوم واخدين صف مبارك ونظامه وحزبه .. دي ناس بايعانا ومتأمرة علينا.. والصحفيين زي حالاتي والمذيعين مغلوبين على أمرهم لأن الرؤساء هم اللي متحكمين ودول بياخدوا ملايين تمن لأكاذيبهم .. الجزيرة نقلت الحقيقة واحنا فينا عقل نصدق او منصدقش اللي بتقوله.. وارجع اقول “بقى أكذب اللي حاطط كاميرا في ميدان التحرير وأصدق اللي شال قنوات كاملة من نايل سات؟ ومنع عني التليفون والانترنت حتى لو هسأل بيهم على أمي وأبويا؟؟

كل دي أسئلة سين وجيم طرحتها على عقولكم .. وجاوب انت يا اللي ربنا اداك العقل

ابوس ايديكم اتوسل ايديكم .. لو مش عاوزين تتظاهروا بلاش تتظاهروا بس على الأقل ساعدوا الناس، ادعوا لهم، متهبطوش في عزيمتهم .. مستعجلين قوي على نزول أشغالكم .. مستعجلين على مهانة كل يوم والظابط اللي بيحتقرك لحد ما يعرف انك تبع فلان بيه .. مستعجلين تنزلوا تروحوا سيتي ستارز والمول .. مستعجلين على حياة بلا كرامة وبلا حقوق سياسية او انسانية مستعجلين على فوضى حياتكم .. حرااااااااااام عليكم، لو انتم لاقيين اللقمة ملايين غيركم طافحة الكوتة ومش لاقياها .. متبقوش شياطين خرسا

بلدنا بتغتصب بقالها تلاتين سنة .. متقولوش للبلد تسكت انتم اسكتم وسيبوا اللي بيقاوم يقاوم

اللهم بلغت اللهم فاشهد .. ربنا يحاسبني ويحاسبكم يوم القيامة على كل كلمة

نصري عصمت

تابعوني على تويتر لمن يرغب :

Tweets by nasry

رجاء اعمل شير للموضوع في أوسع نطاق عشان الناس تفوق ولو عاوز ترد علق براحتك من حق كل واحد يقول رأيه

 

حتى المتحف المصري مسلمش من البلطجية

---