هتاخد بثأر مصر يوم السبت؟ .. طب هتختار صح ولا هتسيب حد يركبك؟

الصورة من موقع فيلجول Filgoal.com

الناس كلها منتظرة يوم السبت عشان ده يوم الاستفتاء على التعديلات الدستورية، لكن انا شايف ان اليوم ده، هو اليوم اللي هتاخد مصر فيه بتارها من اللي ظلموها بنزول ملايين المصريين .. إزاي؟ خليني اقولك.

على مدى التلاتين سنة اللي فاتوا نظام حسني مبارك شوه سمعة المصريين باتهامهم انهم جاهلين سياسيا وغير مؤهلين للديمقراطية وكل ما حد يقول : بس الانتخابات بتتزور، رجالة النظام يقولوا المصريين مبيشاركوش، وكل انتخابات سواء برلمانية او رئاسية او حتى استفتاء خايب على تعديل الدستور مكنتش نسبة المشاركة من صفوف الشعب فيه بتزيد عن عشرة في المية.

 

أحمد نظيف سبق ليه قال المصريين مش مؤهلين للديمقراطية، يعني لسه عيال بترضع مكبرتش عشان كده مبيشاركوش، كأنه بيدي الحق لنفسه ولحكومته تزور الانتخابات عشان يمنع الاخوان من تحقيق اي مكسب سياسي.

عمر سليمان

 

ومن بعد الثورة 25 يناير ما قامت عمر سليمان نفسه طلع في حوار مع المذيعة الأمريكية كريستيان أمانبور، وقالها بالحرف الواحد الشعب المصري مش مؤهل للديمقراطية، وكأننا مش ماليين عينه، وكأن الناس اللي استشهدت في شوارع مصر المحروسة دول مش دليل كفاية ان ده شعب واعي سياسيا.

 

فعلا شعب مصر عمره ما شارك في انتخابات سياسية .. كانت انتخابات الأندية زي الأهلي والزمالك أو انتخابات النقابات مولعة ونسب المشاركة فيها تعدي 90 % والكل ييجي عند السياسة ومكبر دماغه.

 

السبب مكنش ان المصريين مش مؤهلين ولا حاجة زي ما النصابين دول قالوا لكن لأن ببساطة المصري ميحبش اللي يشتغله ويستعبطه، والمصري كان عارف كويس قوي أنهم عاوزينه ينزل عشان المنظر العام في انتخابات مزورة في أزهى عصور الديمقراطية .. ديمقراطية صفوت الشريف وفتحي سرور وحسني وأحمد عز.

 

كانت الناس تاخدها من قاصرها عملا بمبدأن أن لو مش هقدر أغير حاجة على الأقل موسخش نفسي في عملية زي دي.

 

انما يوم السبت يا جدعان .. ده يوم مصر ويوم المصري .. يوم المصريين كلهم .. انا مش نفسي كلنا ننزل بس عشان نصوت بنعم أو بلا في الاستفتاء على التعديلات الدستورية، لكن انا عاوز ننزل ندلي بصوتنا هنا او هنا، ولو حتى محتارين انزل وأبطل صوتك، المهم تكون شاركت والمهم تكون رقم في عدد المشاركين.

 

انتم عارفين ان مع نهاية الانتخابات والفرز بيعلنوا عدد الناس اللي شاركت سواء صوت لنعم أو صوت لا أو أصوات باطلة، رقم المشاركة ده يا جماعة هو هدفنا الحقيقي .. عاوزين ملايين أكبر عشر مرات من ملايين التحرير عارفين ليه؟

 

عشان ناخد بتارنا وتار مصر من مبارك ونظامه ورجالته اللي ياما اتهمونا بالسلبية خلينا نفرج العالم اللي هيراقب الاستفتاء ازاي ان المصريين مش كروديات ومحدش بيشتغلهم وانهم كانوا رافضين نظام مبارك يقرطسهم بنزول انتخابات مزورة وان الانتخابات لما بقت ديمقراطية نزلنا بالملايين.

 

انزل وخد صحابك وأهلك وجيرانك .. خد والدك ووالدتك واخواتك مهما كان حد كبير أو صغير حتى لو عندك ابن نزله خليه يشم ريحة وجو الديمقراطية متخافش عليه، ده انت بتعلمه اواي ياخد حقه ويرسم مستقبل بلده من غير ما حد يضحك عليه زي ما انضحك علينا تلاتين سنة.

 

طب السؤال الأهم هنختار ايه ؟ نعم أم لا؟

 

السؤال ده بقى كل الناس بتتخانق عليه .. احب أقولك مش مهم، المهم أولا انك تشارك

 

ثانيا بقى .. دورك مش بس تشارك، دورك انك تقرا وتفهم من المؤيدين التعديلات ورافضينها وجهة نظر كل واحد من المعسكرين ايه وفي النهاية اللي تحس انه يرضيك ويرضي ضميرك تجاه مصلحة البلد ومصلحتك الشخصية اعمله.

 

اياك تسمع كلام حد في الجامع او حد في الكنيسة وإياك تصدق البهلوانات والمهرجين بتوع ان الشرع بيقول أه وأن مصلحة المسيحي بتقول لأ .. لو كانت الانتخابات والتصويت فيها واجب شرعي ديني مكنش زمانهم عملوها وكنا رحنا خدنا رأي المفتي والبابا عشان يختاروا لينا.

 

طول عمر مبارك وكلابه هم اللي بيختاروا لينا ، إوعاك تخون الشهداء وتبدل مبارك بناس تانية تختار لك، اصحى وفوق ووعي أهلك وجيرانك وناسك وخدهم معاك.، ومتخليش حد يركبك برأيه ويفرض عليك اختيار، اسمع من واحد بيأيد وواحد بيعارض واعمل اللي في ذمتك.

 

لو نزلت الاستفتاء ومن بعده الانتخابات من غير ما تعمل دورك وتقرا وتذاكر وتفهم من المحيطين بيك انهي اختيار هو الأحسن تبقى تستاهل مبارك وتستاهل اللي عمله فيك تلاتين سنة، تبقى زي العبد اللي اتحرر من قيده وخرج من القفص فرفض الحرية واختار العبودية واتمرمغ تحت رجلين سيده.

 

إياك تلغي عقلك وتطلب مساعدة حد، لو مشغلتش عقلك دلوقتي هتشغله امتى، اقرا وإسأل استشير اعرف افتح التلفزيون والانترنت والراديو والجرايد وشوف مصلحة بلدك ومصلحتك فين واختارها، إياك ابدا تشمت فينا مبارك وكلابه وإياك تسيب ناس تختار لك وتخدعك

 

ولما النتيجة تطلع حتى لو كانت عكس اختيارك، خلي قلبك مطمن انك عملت اللي عليك وان الديمقراطية معناها قبول الآخر وخدمة بلدك في اي وضع.

 

اياك شماتة أحمد نظيف وعمر سليمان اياك شماتة مبارك وعيلته، إياك تسيب حد يقول مش قلنا لكم دول شعب عبيد .. خد بتارك واتحرر وانصر دم الشهدا وانزل الاستفتاء، خليك رقم وصوت من ضمن ملايين هتشارك في اشرف حدث في تاريخ مصر.

تابعوني على تويتر :

http://twitter.com/nasry

تابعوني على فيسبوك

http://www.facebook.com/home.php#!/profile.php?id=529965924

 

Advertisements


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s